මූල්‍ය අරමුදලේ ප්‍රතිලාභ මේ මාසය අවසන් වීමට පෙර ලැබීමට නියමිත බවද ඒ වෙනුවෙන් විශේෂ ගිවිසුමකට අත්සන් තැබීමට නියමිත බවද මුදල් රාජ්‍ය අමාත්‍ය රංජිත් සියඹලාපිටිය මහතා පවසනවා. ඔහු පෙන්වා දෙන්නේ ඩොලර් බිලියන 2.9 ක ණය මුදලේ පළමු වාරිකය මෙලෙස ලැබීමට නියමිත බවයි.
එමෙන්ම මෙම ණය ලැබීමේ ප්‍රතිලාභයක් ලෙස ලෝක බැංකුවට ලංකාවට විශේෂ ණය ප්‍රදානයක් ලබාදීමට නියමිත බවද එම මුදල ආසන්න වශයෙන් ඇමරිකානු ඩොලර් දස ලක්ෂ 1500 ට ආසන්න වනු ඇති බවද ඇමැතිවරයා පැවැසුවා.
මීට අමතරව ආසියානු සංවර්ධන බැංකුවද ඩොලර් දස ලක්ෂ 600 ක ප්‍රදානයක් සිදුකිරීමට නියමිතව තිබෙනවා.
මෙම මුදල් ලැබීමෙන් අනතුරුව ශ්‍රී ලංකාවේ ආර්ථිකය නැවත ශක්තිමත් වන බවද පවසන ඇමැතිවරයා පෙන්වා දෙන්නේ මෙම මුදල් නිසි ලෙස කළමනාකරණය කරමින් නැවත ආර්ථික අර්බුදයක් ඇති නොවන ආකාරයේ වාතාවරණයක් රටතුළ ඇති කිරීම සියළුදෙනාගේ වගකීම වන බවයි.
